طال انتظاري

طال انتظاري وانت ساهي ولاهي

أشغلت فكري فيك وأبريت روحي

 بالله كانك غبـت لجـل التباهـي

بتشوف عقب فراقك اشلون نوحي

 هذي حروف القلب مع دمع راهي

جاتك على شانك تمنيت بوحـي

 اشغلتني وانته لك أيـام طاهـي

تطبخ معاليقـي بقـدر ٍ يفوحـي

 ماني بشاعر واكتب الشعر زاهي

لكن عشانك صرت شاعر طموحي

 من قبل اعرفك والقوافي كما هي

والحين شيدت الغلا في صروحي

 ولولا حياتي في محيط النواهـي

لكتب قصايد كاملات الوضوحـي

 قبلك نسيت الشعر مشغول ساهي

وبعدك جمعت الورد من كل دوحي

 سحبت من فكري جميع الدواهـي

واهديتني في غفلة الناس شوحي

 بالله ترجع يا بعـد كـل جاهـي

أنت الوحيد اللي تداوي جروحـي